Plantun de Prouvènço

Pèr coumpara dos planto d'encò nostre

Parapholis filiformis & Cycloloma atriplicifolium

Parapholis filiformis

Poaceae Graminaceae

Nom en français : Lepture filiforme.

Descripcioun :
Lou leturo-primachòu es uno planto que trachis dins li sablo e pelouso salado (NaCl) raramen liuen de la mar. Au nostre èi coumun soulamen dins noste relarg de "plano de coustiero", majamen en Camargo. S'atrobo uno alo sus la careno di glumo (dos glumo pèr espigueto eici e uno pèr lou gènre Hainardia) que fai uno bando blanco (vèire li fotò à man drecho). Apoundèn que lis antèro fan pu de 1 mm au contro de soun cousin lou leturo-enarca, Parapholis incurva.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 8 à 30 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Parapholis
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 3 à 15 cm
Flourido : Printèms

Sòu : NaCl
Autour basso e auto : 0 à 50 m
Aparado : Noun
Mai à jun

Liò : Sablo - Tepiero salado - Sansouiro
Estànci : Termoumediterran à Mesoumediterran
Couroulougi : Mediterrano-Atlantico
Ref. sc. : Parapholis filiformis (Roth) C.E.Hubb., 1946

Ciclolomo

Cycloloma atriplicifolium

Amaranthaceae Chenopodiaceae

Nom en français : Cycloloma à feuilles d'arroche.

Descripcioun :
Planto de l'an, forço raro au nostre, que trachis dins la sablo e li duno. La ciclolomo èi proun ramificado emé uno cambo en zigue-zague cuberto de péu en aragno. Li fueio, poupouso, dounon d'èr à-n-aquéli de l'armòu-fèr. Li flour soun en espigo e caduno caup 5 tepalo emé d'alo sóudado que vènon vióuleto.

Usanço :
La ciclolomo nous vèn d'Americo de l'uba. Lis indian Zuni (fotò) e Hopi (Pople Pueblò dóu Nouvèu-Messique) acampon li grano e emé la farino, mesclado à la de gros-blad, n'en fan de bouiaco e de sucrarié cuecho à la vapour.